സര്‍ക്കാരിനു തിരിച്ചടി; ഗവര്‍ണര്‍ മുന്നോട്ടുതന്നെ

തിരുവനന്തപുരം: സാങ്കേതിക സര്‍വകലാശാലാ വൈസ് ചാന്‍സലറെ സുപ്രീംകോടതിയും കേരള ഫിഷറീസ് ആന്‍ഡ് ഓഷ്യന്‍ സ്റ്റഡീസ് (കുഫോസ്) വിസിയെ ഹൈക്കോടതിയും പുറത്താക്കിയതോടെ സര്‍വകലാശാലാ വൈസ് ചാന്‍സലര്‍ നിയമനം സംബന്ധിച്ച്‌ സര്‍ക്കാരും ഗവര്‍ണറും തമ്മിലുള്ള പോരില്‍ ഗവര്‍ണര്‍ പിടിമുറുക്കുന്നു.
വിസി നിയമനവുമായി ബന്ധപ്പെട്ട് ആഴ്ചകളായി ഗവര്‍ണറും സര്‍ക്കാരും തമ്മിലുള്ള തര്‍ക്കത്തിനിടെ, ഇന്നലെ കുഫോസ് വിസിയെ ഹൈക്കോടതി പുറത്താക്കിയതു സര്‍ക്കാരിനു കനത്ത തിരിച്ചടിയായി.

മാനദണ്ഡങ്ങള്‍ പാലിച്ചല്ല വിസി നിയമനം നടത്തിയിട്ടുള്ളതെന്നും, പുറത്താക്കാതിരിക്കാന്‍ എന്തെങ്കിലും വിശദീകരണം ഉണ്ടെങ്കില്‍ അതു നല്കണമെന്നും കാട്ടി സംസ്ഥാനത്തെ 10 സര്‍വകലാശാലാ വൈസ് ചാന്‍സലര്‍മാര്‍ക്കു ഗവര്‍ണര്‍ നോട്ടീസ് നല്കി നേരിട്ട് ഹിയറിംഗിനായി വിളിച്ചിരിക്കുന്നതിനിടെയാണ് ഇന്നലെ കുഫോസ് സര്‍വകലാശാലാ വിസി നിയമനത്തില്‍ യുജിസി നിബന്ധനകള്‍ പാലിച്ചില്ലെന്നു കാട്ടി ഹൈക്കോടതി നിയമനം റദ്ദാക്കിയത്.

വിസി നിയമനത്തിനായുള്ള പട്ടികയിലേക്ക് അപേക്ഷ നല്കിയവരില്‍, മറ്റുള്ളവര്‍ക്കു യോഗ്യതയില്ലെങ്കില്‍ ഒരാളുടെ പേരു മാത്രമായി ചാന്‍സലര്‍ക്കു നല്കിയാല്‍ എന്താണു തെറ്റെന്നായിരുന്നു സംസ്ഥാന സര്‍ക്കാര്‍ ഇതുവരെ മുന്നോട്ടുവച്ച വാദം. കെടിയു, കുഫോസ് വിസിമാരുടെ നിയമനങ്ങള്‍ റദ്ദാക്കിയതോടെ ഈ വാദം ഇനി നിലനില്‍ക്കില്ല.

വിസി നിയമനത്തില്‍ യുജിസി മാര്‍ഗനിര്‍ദേശങ്ങളോടൊപ്പംതന്നെ സംസ്ഥാന നിയമങ്ങള്‍ക്കും പ്രാധാന്യമുണ്ടെന്ന നിലപാടും സര്‍ക്കാര്‍ മുന്നോട്ടുവച്ചിരുന്നു. ആ വാദത്തിനും തുടര്‍ച്ചയായ കോടതിവിധികളോടെ ബലമില്ലാതായി. എന്നാല്‍, യുജിസി ചട്ടം പാലിക്കാതെ സംസ്ഥാന സര്‍ക്കാര്‍ സേര്‍ച്ച്‌ കമ്മിറ്റി മുഖേന നല്കിയ ലിസ്റ്റിനു ഗവര്‍ണര്‍ അംഗീകാരം നല്കിയതിനെയും കോടതി ഇന്നലെ വിമര്‍ശിച്ചതും ഏറെ ശ്രദ്ധേയമാണ്.

ഇതോടെ, ഇനിയുള്ള ഗവര്‍ണറുടെ നീക്കം ഏറെ പ്രാധാന്യമുള്ളതാണ്. കെടിയു വിസിക്കെതിരേയുണ്ടായ സുപ്രീംകോടതി വിധിക്കു പിന്നാലെ കഴിഞ്ഞ മാസം ഗവര്‍ണര്‍ സംസ്ഥാനത്തെ 10 സര്‍വകലാശാലാ വൈസ് ചാന്‍സലര്‍മാരോട് അടിയന്തരമായി രാജി ആവശ്യപ്പെട്ടിരുന്നു.

എന്നാല്‍, വൈസ് ചാന്‍സലര്‍മാര്‍ കോടതിയെ സമീപിക്കുകയും ഹൈക്കോടതി ഇവര്‍ക്കു ഗവര്‍ണറുടെ മുന്പാകെ വിശദീകരണം നല്കാന്‍ കൂടുതല്‍ സമയം അനുവദിക്കുകയും ചെയ്തിരുന്നു. തുടര്‍ന്ന് നേരിട്ടുള്ള ഹിയറിംഗിനായി സമയം നല്കാന്‍ തീരുമാനിച്ച സാഹചര്യത്തിനിടെയാണ് ഇന്നലെ കുഫോസ് വിസിയെ ഹൈക്കോടതി പുറത്താക്കിയത്.

യുജിസി മാനദണ്ഡത്തിനു വിരുദ്ധമായി സേര്‍ച്ച്‌ കമ്മിറ്റി ഒറ്റപ്പേരുമാത്രം നല്കപ്പെട്ടവര്‍, സേര്‍ച്ച്‌ കമ്മിറ്റിയില്‍ അക്കാദമിക് വിദഗ്ധര്‍ക്കു പകരം സര്‍ക്കാര്‍ പ്രതിനിധികള്‍ തുടങ്ങിയ കാരണങ്ങളാലാണ് വിസിമാര്‍ക്കു ഗവര്‍ണര്‍ നോട്ടീസ് നല്കിയത്.

ഒക്ടോബര്‍ 24നു കാലാവധി അവസാനിച്ച കേരള സര്‍വകലാശാല വൈസ് ചാന്‍സലര്‍ ഡോ. വി.പി. മഹാദേവന്‍പിള്ള, എംജി വിസി ഡോ. സാബു തോമസ്, കൊച്ചിന്‍ യൂണിവേഴ്സിറ്റി ഓഫ് സയന്‍സ് ആന്‍ഡ് ടെക്നോളജി വിസി ഡോ. കെ.എന്‍. മധൂസുദനന്‍, കണ്ണൂര്‍ വിസി ഡോ. ഗോപിനാഥ് രവീന്ദ്രന്‍, കേരള യൂണിവേഴ്സിറ്റി ഓഫ് ഫിഷേഴ്സ് ആന്‍ഡ് ഓഷ്യന്‍ സ്റ്റഡീസ് വിസി ഡോ.കെ. റിജി ജോണ്‍, എപിജെ അബ്ദുള്‍കലാം സാങ്കേതിക സര്‍വകലാശാല മുന്‍ വിസി ഡോ. എം.എസ്. രാജശ്രീ, ശ്രീശങ്കര സംസ്കൃത സര്‍വകലാശാലാ വിസി ഡോ. എം.വി. നാരായണന്‍, കാലിക്കറ്റ് സര്‍വകലാശാല വിസി ഡോ. എം.കെ. ജയരാജ്, , തുഞ്ചത്ത് എഴുത്തച്ഛന്‍ മലയാളം സര്‍വകലാശാല വിസി ഡോ. വി. അനില്‍കുമാര്‍, കേരള ഡിജിറ്റല്‍ സര്‍വകലാശാല വിസി ഡോ. സജി ഗോപിനാഥ്, ശ്രീനാരായണ ഓപ്പണ്‍ സര്‍വകലാശാല വിസി പി.എം. മുബാറക് എന്നിവരോടായിരുന്നു വിശദീകരണം തേടിയത്.

വൈസ് ചാന്‍സലര്‍മാരെ പുറത്താക്കുന്നത് ഉള്‍പ്പെടെയുള്ള ശക്തമായ നടപടികള്‍ക്കു വേഗം കൂട്ടാന്‍ ഇന്നലത്തെ കോടതി വിധി കാരണമായേക്കും. ഇതിനിടെ, ഹൈക്കോടതി വിധിക്കെതിരേ അപ്പീല്‍ പോകുന്നതുള്‍പ്പെടെയുള്ള കാര്യങ്ങളില്‍ സര്‍ക്കാര്‍ തലത്തില്‍ ഇന്നോ നാളെയോ തീരുമാനം ഉണ്ടാവും. നിയമവശങ്ങള്‍ കൃത്യമായി പരിശോധിച്ച ശേഷമാവും ഇക്കാര്യത്തില്‍ അന്തിമ തീരുമാനമെന്നാണു സര്‍ക്കാര്‍ വൃത്തങ്ങള്‍ നല്കുന്ന സൂചന.

Similar Articles

Comments

LEAVE A REPLY

Please enter your comment!
Please enter your name here

Advertisment

Most Popular

ഇന്ധന സെസ് പിൻവലിക്കില്ല: കെഎൻ ബാലഗോപാൽ

നവകേരള സൃഷ്ടിക്കായുള്ള പ്രവർത്തനങ്ങളുമായി മുന്നോട്ട് പോകുമെന്ന് ധനമന്ത്രി കെ.എൻ ബാലഗോപാൽ. ക്ഷേമ പദ്ധതികൾ തുടരാൻ നികുതി നിർദേശങ്ങൾ അതെ രീതിയിൽ തുടരും. പെട്രോളിനും ഡീസലിനും ഏർപ്പെടുത്തിയ സെസ് പിൻവലിക്കില്ലെന്നും ധനമന്ത്രി വ്യക്തമാക്കി. അതെസമയം,...

പ്രണയ ദിനം കൗ ഹഗ്ഗ് ഡേ ആചരിക്കും: നിർദ്ദേശവുമായി കേന്ദ്രം

പ്രണയ ദിനം കൗ ഹഗ്ഗ് ഡേ ആചരിക്കാൻ കേന്ദ്ര  നിർദേശം. കേന്ദ്ര മൃഗസംരക്ഷണ ബോർഡാണ് ‘കൗ ഹഗ് ഡേ’ എന്ന നിർദേശം നൽകിയത്.  മൃഗങ്ങളോടുള്ള അനുകമ്പ വളർത്തുകയാണു ഇതിലൂടെ ലക്ഷ്യമെന്ന്    വിശദീകരണം....

മാളികപ്പുറം സിനിമയുടെ അന്‍പതാം ദിനാഘോഷത്തിന്റെ ഭാഗമായി അന്‍പത് കുട്ടികള്‍ക്ക് മജ്ജമാറ്റിവെക്കല്‍ ശസ്ത്രക്രിയക്കുള്ള സഹായം നല്‍കും

  കോഴിക്കോട് : മാളികപ്പുറം സിനിമയുടെ അന്‍പതാം ദിനാഘോഷത്തിന്റെ ഭാഗമായി നിർദ്ധന കുടുംബങ്ങളിലെ അന്‍പത് കുഞ്ഞുങ്ങള്‍ക്ക് ബോണ്‍മാരോ ട്രാന്‍സ്പ്ലാന്റ് നിര്‍വ്വഹിക്കുന്നതിനുള്ള സഹായം നല്‍കുമെന്ന് നിര്‍മ്മാതാവ് ആന്റോ ജോസഫ് അറിയിച്ചു. കേരളത്തിലെ ആസ്റ്റര്‍ ഹോസ്പിറ്റലുകളുമായി സഹകരിച്ചാണ്...