മെട്രോയില്‍ സ്ഫോടനം നടത്തും എന്ന് വ്യാഖ്യാനിക്കപ്പെട്ട മെട്രോ ട്രെയിനിലെ എഴുത്തുകള്‍, ഗ്രാഫിറ്റി എന്ന് നിഗമനം.
വിദേശ രാജ്യങ്ങളിലും മറ്റിടങ്ങളിലും പൊതുമുതല്‍ നശിപ്പിക്കുന്ന, അന്താരാഷ്ട്ര തീവ്രവാദ സംഘടനയായ റെയില്‍ ഹൂണ്‍സ് മാതൃകയിലാണ് കൊച്ചി മെട്രോ ട്രെയിനുകളില്‍ ‘സന്ദേശം’ എഴുതിയിരിക്കുന്നത്. ഉദ്യോഗസ്ഥരുടെ കണ്ണുവെട്ടിച്ച്‌ മെട്രോ യാര്‍ഡിലേക്ക് നുഴഞ്ഞുകയറി മണിക്കൂറുകള്‍ക്കുള്ളില്‍ നടത്തിയ പെയിന്റിംഗ് കെഎംആര്‍എല്ലിന്റെ സുരക്ഷാവീഴ്ചയിലേക്കാണ് വിരല്‍ ചൂണ്ടുന്നതെന്ന് കേന്ദ്ര ഏജന്‍സികള്‍ പറയുന്നു.
22-ന് നിര്‍ത്തിയിട്ടിരുന്ന പമ്ബ ട്രെയിനില്‍ ഇംഗ്ലീഷില്‍ സ്പ്രേ പെയിന്റിലാണ് എഴുതിയിരുന്നത്. മൂന്ന് ബോഗികളില്‍ വരച്ചു. പ്ലേ യുഫോസ്, ബേണ്‍ ഫസ്റ്റ് ഹിറ്റ് കൊച്ചി എന്നിങ്ങനെയാണ് വാക്കുകള്‍. ‘ബേണ്‍ ഫസ്റ്റ് ഹിറ്റ് കൊച്ചി’ എന്ന് എഴുതിയതാണ് തീവ്രവാദ ഭീഷണിയായി വ്യാഖ്യാനിക്കപ്പെട്ടത്. സംഭവത്തിന് പിന്നില്‍ തീവ്രവാദ സ്വഭാവം ഉണ്ടോ എന്നും അന്വേഷിക്കുന്നുണ്ട്.
ഐപിസി 447, 427 വകുപ്പുകള്‍ പ്രകാരം അതിക്രമിച്ച്‌ കയറി പൊതുമുതല്‍ നശിപ്പിച്ചതിന് പോലീസ് കേസെടുത്ത് അന്വേഷണം ആരംഭിച്ചു. സി.സി.ടി.വി ദൃശ്യങ്ങള്‍ പരിശോധിച്ചപ്പോള്‍ രണ്ട് പേര്‍ ഇത് ചെയ്തതായി കണ്ടെത്തി. ഇവരുടെ മുഖവും അന്വേഷണ സംഘത്തിന് ലഭിച്ചിട്ടുണ്ട്. എന്നാല്‍ അത് ആരാണെന്ന് കണ്ടെത്താനായിട്ടില്ല. മലയാളികളാണ് സംഭവത്തിന് പിന്നിലെന്നാണ് പ്രാഥമിക നിഗമനം.
