ചാമ്പ്യൻസ് ലീഗില്‍ അവസാന നിമിഷത്തെ ഗോളില്‍ എതിരാളികളെ ഞെട്ടിച്ച്‌ ക്രിസ്റ്റ്യാനോ റൊണാള്‍ഡോ. മാഞ്ചസ്റ്റര്‍ യുണൈറ്റഡ് ഒന്നിനെതിരെ രണ്ടുഗോളുകള്‍ക്കാണ് വിയ്യാറലിനെ തോല്‍പ്പിച്ചത്.
കളിയുടെ ആദ്യപകുതി ഗോള്‍ രഹിതമായിരുന്നു. ക്രിസ്റ്റ്യാനോയുടെ മുന്നേറ്റങ്ങളെ വിയ്യാറല്‍ ടീം സമര്‍ത്ഥമായി തടഞ്ഞു. രണ്ടാം പകുതിയില്‍ പാകോ അല്‍കാസറാണ് 53-ാം മിനിറ്റില്‍ വിയ്യാറലിനെ മുന്നിലെത്തിച്ചത്. എന്നാല്‍ ഏഴുമിനിറ്റിനകം ചെമ്ബട സമനില പിടിച്ചു. അലെക്‌സ് ടെല്ലസാണ് ഗോള്‍ നേടിയത്. സമനിലയിലേക്ക് നീങ്ങിയ കളിയാണ് ക്രിസ്റ്റ്യാനോ മികവാര്‍ന്ന ഗോളിലൂടെ സ്വന്തമാക്കിയത്. അവസാന നിമിഷത്തിലെ അധികസമയത്താണ് ഗോള്‍ വീണത്. ബോക്‌സിലേക്ക് പാഞ്ഞുകയറി വലതു വിംഗില്‍ നിന്നും തൊടുത്ത പന്ത് ക്രിസ്റ്റ്യാനോ വലയ്‌ക്കുള്ളില്‍ കയറ്റി.
പന്ത്രണ്ടാം തവണയാണ് ക്രിസ്റ്റ്യാനോ അവസാന നിമിഷത്തില്‍ ഗോള്‍ നേടുന്നത്. സെര്‍ജീ അഗ്വ്യൂറോയാണ് ഇതേ നേട്ടത്തിനൊപ്പമുള്ളത്.
