BBC ഡോക്യുമെന്ററി കേരളത്തിൽ  പ്രദർശിപ്പിക്കാൻ ഡി വൈ എഫ് ഐ, എസ് എഫ് ഐ തീരുമാനം.  വിവിധ കേന്ദ്രങ്ങളിൽ പ്രദർശനം  ആരംഭിച്ചു. സർവ്വകലാശാല, കോളേജ് ക്യാമ്പസുകളിൽ എസ് എഫ് ഐ നേതൃത്വത്തിലാണ് പ്രദർശനം. യൂത്ത് കോൺഗ്രസും ഡോക്യുമെൻ്ററി പ്രദർശിപ്പിക്കും.  തടയണമെന്ന ആവശ്യവുമായി ബി ജെ പി രംഗത്ത് വന്നു. “ഇന്ത്യ – ദി മോഡി ക്വസ്റ്റ്യൻ” പ്രദർശിപ്പിക്കുമെന്ന് സംസ്ഥാന പ്രസിഡൻ്റ് വി വസീഫ് അറിയിച്ചു. കാലിക്കറ്റ് സർവ്വകലാശാല ക്യാമ്പസിലും ഇന്ന് ഡോക്യുമെൻ്ററി പ്രദർശിപ്പിക്കും.  വൈകീട്ട് 7 നാണ് പ്രദർശനം. എസ് എഫ് ഐ യൂണിവേഴ്സിറ്റി യൂണിറ്റ്  കമ്മിറ്റിയാണ് പ്രദർശനം സംഘടിപ്പിക്കുന്നത്. ഗുജറാത്ത് വംശഹത്യ പ്രമേയമായ BBC ഡോക്യുമെന്ററി കേരളത്തിൽ 2000 കേന്ദ്രങ്ങളിൽ പ്രദർശിപ്പിക്കാനാണ് ഡി വൈ എഫ് ഐ തീരുമാനം.  “ഇന്ത്യ – ദി മോദി ക്വസ്റ്റ്യൻ”  ജനങ്ങളുടെ വിലയിരുത്തലിന് വിടുന്നതിൻ്റെ ഭാഗമായാണ്  പ്രദർശനം. ഡോക്യുമെൻ്ററിക്കെതിരായ കേന്ദ്ര സർക്കാർ നീക്കം മാധ്യമ സ്വാതന്ത്ര്യത്തിന് മേലുള്ള വെല്ലുവിളിയാണെന്ന് അഖിലേന്ത്യാ പ്രസിഡൻ്റ് എഎ റഹിം എംപി പറഞ്ഞു. സംഘർഷമുണ്ടാക്കുക DYFI അജണ്ടയല്ല.സത്യം എത്ര മൂടിവെക്കാൻ ശ്രമിച്ചാലും ജനങ്ങൾക്ക് മുന്നിൽ തുറന്ന് കാണിക്കുമെന്ന് ഡി വൈ എഫ് ഐ സംസ്ഥാന സെക്രട്ടി വി കെ സനോജ് പ്രതികരിച്ചു. ഡോക്യുമെന്റിയിൽ മതവിദ്വേഷം ഉണ്ടാക്കുന്ന ഒന്നുമില്ല. ഇത് രാജ്യ വിരുദ്ധ പ്രവർത്തനമായി കാണേണ്ടതില്ലെന്നും സനോജ് വ്യക്തമാക്കി.സംസ്ഥാനത്തെ കോളേജ് ക്യാമ്പസുകളിൽ ഡോക്യുമെൻ്ററി പ്രദർശിപ്പിക്കാനാണ് എസ് എഫ് ഐ തീരുമാനം. ജനു 27 നകം പ്രദർശനം സംഘടിപ്പിക്കും. വംശഹത്യയുടെ ഓർമകൾ അധികാരം ഉപയോഗിച്ച് മറയ്ക്കാനാവില്ലെന്ന് യൂത്ത് കോൺഗ്രസ് സംസ്ഥാന പ്രസി ഷാഫി പറമ്പിൽ പ്രതികരിച്ചു. ഡോക്യുമെൻ്ററി പ്രദർശിപ്പിക്കുമെന്നും യൂത്ത് കോൺഗ്രസ്  നേതൃത്വം അറിയിച്ചു. കേരളത്തിലെ ഡോക്യുമെൻ്ററി പ്രദർശനം മുഖ്യമന്ത്രി ഇടപെട്ട് തടയണമെന്ന  കേന്ദ്ര സഹമന്ത്രി വി മുരളീധരൻ ആവശ്യപ്പെട്ടു. ഇത് സംബന്ധിച്ച്  മുഖ്യമന്ത്രിക്ക് പരാതി നൽകിയതായി കെ സുരേന്ദ്രൻ അറിയിച്ചു.