സ്വര്‍ണകടത്ത് കേസ് വീണ്ടും സഭയില്‍ ഉന്നയിക്കാനുള്ള പ്രതിപക്ഷ നീക്കം തടഞ്ഞ് സ്പീക്കര്‍. സബ്മിഷന് കേന്ദ്രവുമായി ബന്ധപ്പെട്ട കാര്യമാണെന്നും അനുമതി നല്‍കരുതെന്നും നിയമമന്ത്രി പി രാജീവ് ആവശ്യപ്പെട്ടു.
നേരത്തെ അടിയന്തര പ്രമേയമായി ചര്‍ച്ച ചെയ്ത വിഷയമെന്നാണ് മാത്യു ടി തോമസ് അറിയിച്ചത്. സബ് മിഷന് എതിരെ ക്രമ പ്രശ്നവുമായി ഭരണപക്ഷം രംഗത്തെത്തിയതോടെയാണ് സ്പീക്കര്‍ സബ്മിഷന് അനുമതി നിഷേധിച്ചത്.
വിദേശകാര്യമന്ത്രി പറഞ്ഞ പ്രോട്ടോകോള്‍ ലംഘനം അടക്കമുള്ള കാര്യങ്ങളാണ് താന്‍ ഉന്നയിക്കുന്നതെന്ന് വി ഡി സതീശന്‍ സഭയില്‍ ഉന്നയിച്ചിരുന്നു. സ്വര്‍ണ്ണക്കടത്തുമായി ബന്ധപ്പെട്ട് നടക്കാന്‍ പാടില്ലാത്തത് നടന്നുവെന്നാണ് വിദേശ കാര്യമന്ത്രി പറഞ്ഞത്. മുഖ്യമന്ത്രി പ്രോട്ടോകോള്‍ ലംഘിച്ചു എന്ന് വരെ ആരോപണം ഉയര്‍ന്നിരുന്നുവെന്നും വി ഡി സതീശന്‍ വ്യക്തമാക്കി. എന്നാല്‍ കേരള സര്‍ക്കാരിന്റെ പ്രാഥമിക പരിഗണയില്‍ പെടാത്ത കാര്യമാണിതെന്ന് പി രാജീവ് പറഞ്ഞു. കോണ്‍സുലേറ്റ് കേന്ദ്ര സര്‍ക്കാര്‍ പരിധിയിലാണ്. അതിനാല്‍ സബ്മിഷന് ചട്ട വിരുദ്ധമാമെന്നും മന്ത്രി വ്യക്തമാക്കി. എന്നാല്‍
സി ബി ഐ അന്വേഷണം വേണമെന്ന നിലപാടിലാണ് പ്രതിപക്ഷം. കോണ്‍സുലേറ്റ് എന്ന വാക്ക് പറയാന്‍ പാടില്ല എന്നില്ല. സിബിഐ അന്വേഷണത്തിന് ശുപാര്‍ശ ചെയ്യേണ്ടത് സംസ്ഥാന സര്‍ക്കാരാണ്. മടിയില്‍ കനമില്ലാത്തത് കൊണ്ട് വഴിയില്‍ പേടിയില്ല എന്ന് ബോര്‍ഡ് എഴുതി വെക്കാതെ മുഖ്യമന്ത്രി മറുപടി പറയണമെന്നും വി ഡി സതീശന്‍ ആവശ്യപ്പെട്ടു.
