തിരുവനന്തപുരം: സംസ്‌ഥാനത്ത് ഇന്നും വ്യാപക മഴക്ക് സാധ്യതയുണ്ടെന്ന് വ്യക്തമാക്കി കാലാവസ്‌ഥാ നിരീക്ഷണ കേന്ദ്രം.
വടക്കന്‍ ജില്ലകളില്‍ ആയിരിക്കും മഴ കൂടുതല്‍ ശക്‌തമാകുക. ഇതേ തുടര്‍ന്ന് 6 ജില്ലകളില്‍ യെല്ലോ അലര്‍ട് പ്രഖ്യാപിച്ചിട്ടുണ്ട്. തൃശൂര്‍, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് എന്നീ ജില്ലകളിലാണ് ഇന്ന് യെല്ലോ അലര്‍ട് പ്രഖ്യാപിച്ചിരിക്കുന്നത്.
കൂടാതെ വരും മണിക്കൂറുകളില്‍ ഇടുക്കി, എറണാകുളം,തൃശൂര്‍, കോഴിക്കോട്, വയനാട്, കണ്ണൂര്‍ എന്നീ ജില്ലകളില്‍ ഒറ്റപ്പെട്ടയിടങ്ങളില്‍ മഴയ്‌ക്കും സാധ്യതയുണ്ട്. ഉച്ചക്ക് ശേഷം ആയിരിക്കും മഴ കൂടുതല്‍ കനക്കാന്‍ സാധ്യതയുള്ളത്. ഒഡീഷ തീരത്ത് നിലനില്‍ക്കുന്ന ന്യൂനമര്‍ദ്ദവും, മഹാരാഷ്‌ട്ര തീരം മുതല്‍ കര്‍ണാടക തീരം വരെയുള്ള ന്യൂനമര്‍ദ്ദ പാത്തിയുടെ സ്വാധീനവുമാണ് നിലവില്‍ സംസ്‌ഥാനത്ത് മഴയ്‌ക്ക്‌ കാരണം.
കേരള തീരത്ത് ഉയര്‍ന്ന തിരമാലയ്‌ക്കും കടലാക്രമണത്തിനും സാധ്യതയുണ്ടെന്നും അധികൃതര്‍ മുന്നറിയിപ്പ് നല്‍കിയിട്ടുണ്ട്. അതേസമയം കോഴിക്കോട്, പാലക്കാട്, വയനാട് ജില്ലകളില്‍ നിലവില്‍ ശക്‌തമായ മഴ തുടരുകയാണ്.
