ലോക അത്ലറ്റിക് ചാമ്ബ്യന്‍ഷിപ്പില്‍ ഇന്ത്യയുടെ അഭിമാനമുയര്‍ത്തിയ ഹിമാ ദാസിനെ അസം പൊലീസില്‍ ഡെപ്യൂട്ടി സൂപ്രണ്ടായി നിയമിച്ചു. ഇത് തന്റെ സ്വപ്ന സാക്ഷാത്കാരമാണെന്ന് ഹിമ പറഞ്ഞു. ഗുവാഹത്തിയില്‍ സംഘടിപ്പിച്ച ചടങ്ങില്‍ അസം മുഖ്യമന്ത്രി സര്‍ബാനന്ദ സോനോവാല്‍ ഉള്‍പ്പടെയുള്ള പ്രമുഖര്‍ പങ്കെടുത്തു.
പൊലീസാകുകയെന്നത് തന്റെ കുട്ടിക്കാലത്തേയുള്ള സ്വപ്നമാണെന്നും, അതിനാല്‍ത്തന്നെ ഈ നിമിഷം തനിക്ക് ഏറെ പ്രിയപ്പെട്ടതാണെന്നും ഹിമ ദാസ് പറഞ്ഞു. ‘ എന്റെ സ്‌കൂള്‍ കാലം മുതല്‍ പൊലീസ് ഓഫീസര്‍ ആകണമെന്ന ആഗ്രഹം എനിക്കുണ്ടായിരുന്നു.
എന്റെ അമ്മയും അത് ആഗ്രഹിച്ചു.’-ഹിമ ദാസ് പറഞ്ഞു. സംസ്ഥാനത്തിന്റെ പുരോഗതിക്കായി താന്‍ പ്രവര്‍ത്തിക്കുമെന്നും, അതോടൊപ്പം തന്റെ കായിക ജീവിതം തുടരുമെന്നും അവര്‍ വ്യക്തമാക്കി.
‘സ്പോര്‍ട്സ് മൂലമാണ് എനിക്ക് എല്ലാം ലഭിച്ചത്. സംസ്ഥാനത്തെ കായികരംഗത്തെ മെച്ചപ്പെടുത്തുന്നതിനായി പ്രവര്‍ത്തിക്കാന്‍ ഞാന്‍ ശ്രമിക്കുകയും, അസം പൊലീസിനായി ജാഗ്രതയോടെ പ്രവര്‍ത്തിക്കുകയും ചെയ്യുമെന്ന് ഹിമ ദാസ് പറഞ്ഞു
