ഇന്ത്യ- ശ്രീലങ്ക മത്സരം: ടീമുകൾ ഇന്ന് പരിശീലനത്തിന് ഇറങ്ങും

ഇന്ത്യ- ശ്രീലങ്ക ടീമുകള്‍ ഇന്ന് കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ പരിശീലനത്തിന് ഇറങ്ങും. ഉച്ചയ്ക്ക് ഒരു മണി മുതല്‍ നാലുവര ലങ്കന്‍ ടീമും അഞ്ച് മണിമുതല്‍ എട്ടുവരെ ഇന്ത്യയും പരിശീലനം നടത്തും. മത്സരത്തിന് വേണ്ടി പൂർണ സജ്ജമെന്ന് കേരള ക്രിക്കറ്റ് അസോസിയേഷൻ.കൊല്‍ക്കത്തയില്‍ നിന്ന് പ്രത്യേക വിമാനത്തിൽ തലസ്ഥാനത്തെത്തിയ ഇന്ത്യ -ശ്രീലങ്ക ടീമുകള്‍ പ്രത്യേകമായ സജ്ജമാക്കി ഹോട്ടലുകളിൽ വിശ്രമത്തിലാണ്. ഹോട്ടലിലെ വിശ്രമത്തിന് ശേഷം ഇരു ടീമുകളും ഇന്ന് പരിശീലനത്തിന് ഇറങ്ങും. ഉച്ചയ്ക്ക് ഒരുമണിക്ക് പരിശീലനത്തിന് എത്തുന്ന ലങ്കന്‍ ടീം നാല് മണിവരെ പരിശീലനം നടത്തും. ഇന്ത്യൻ ടീമിന്‍റെ പരിശീലനം വൈകിട്ട് അഞ്ച് മണിമുതല്‍ എട്ടുമണിവരെയാണ്. ട്വന്റി ട്വന്റിക്ക് പിന്നാലെ ഏകദിന പരമ്പരയും സ്വന്തമാക്കിയതിന്‍റെ ആത്മവിശ്വാസത്തിലാണ് രോഹിതിന്‍റെ സംഘം. നാണക്കേട് ഒഴിവാക്കാന്‍ ആശ്വാസ ജയമാണ് ശ്രീലങ്കയുടെ ലക്ഷ്യം. കാര്യവട്ടത്ത് ഇത് രണ്ടാം തവണയാണ് ഏകദിന മത്സരം എത്തുന്നത്. ആദ്യം നടന്ന ഏകദിനത്തില്‍ വെസ്റ്റ്ഇന്‍ഡീസിനെ ഇന്ത്യ അനായാസം തോല്‍പ്പിച്ചിരുന്നു. മത്സരത്തിന്‍റെ പരമാവധി ടിക്കറ്റുകള്‍ ഇന്ന് കൊണ്ടു വിറ്റുപോകുമെന്ന പ്രതീക്ഷയിലാണ് കേരള ക്രിക്കറ്റ് അസോസിയേഷന്‍.വീണ്ടുമൊരു ഏകദിന മത്സരം കാര്യവട്ടത്ത് എത്തുമ്പോള്‍ വലിയ പ്രതീക്ഷയിലാണ് ആരാധകര്‍. ബാറ്റിങിന് അനുകൂലമായ പിച്ചില്‍ റണ്ണൊഴുകമെന്ന പ്രതീക്ഷയിലും.