അധികാരമേറ്റ് ആദ്യ ആഴ്ചയില്‍ തന്നെ ജനപിന്തുണയില്‍ ട്രംപിനെ മറി കടന്ന് യു.എസ് പ്രസിഡന്‍റ് ജോ ബൈഡന്‍. ട്രംപിന്റെ നാല് വര്‍ഷങ്ങളില്‍ ഏതുസമയത്തും നേടിയതിനെക്കാള്‍ ഉയര്‍ന്ന ജനപിന്തുണയാണ് കഴിഞ്ഞ ആഴ്ചയിലെ ബൈഡന്റെ കണക്കുകള്‍ സൂചിപ്പിക്കുന്നത്. മോന്‍മൗത്ത് യൂനിവേഴ്സിറ്റി നടത്തിയ അഭിപ്രായ സര്‍വേയില്‍ 54 ശതമാനം അമേരിക്കക്കാരും ബൈഡന്റെ ഭരണത്തുടക്കത്തില്‍ സംതൃപ്തരാണ്. അതെ സമയം 30 ശതമാനമാണ് എതിര്‍പ്പ് പ്രകടിപ്പിച്ചത്.
എന്നാല്‍, 40 ശതമാനമോ അതില്‍ താഴെയോ ആയിരുന്നു പ്രസിഡന്‍റ് പദവിയില്‍ ട്രംപ് നേടിയ പരമാവധി ജനപിന്തുണ. ജനുവരി 20ന് അധികാരമൊഴിഞ്ഞ് മടങ്ങുമ്ബോള്‍ അത് 34 ശതമാനത്തിലേക്ക് പതിക്കുകയും ചെയ്തിരുന്നു.
ഡെമോക്രാറ്റുകള്‍ക്ക് ശുഭവാര്‍ത്തയാണ് അഭിപ്രായ സര്‍വേകളെങ്കിലും യുഎസ് ഇപ്പോഴും ട്രംപ് സൃഷ്ടിച്ച ധ്രുവീകരണത്തില്‍നിന്ന് മുക്തമായിട്ടില്ലെന്ന് കൂടി സര്‍വേ റിപ്പോര്‍ട്ടുകള്‍ സൂചിപ്പിക്കുന്നു. ‘മൊത്തത്തില്‍ ട്രംപിനെക്കാള്‍ പിന്തുണ നേടാന്‍ ബൈഡനായിട്ടുണ്ടെങ്കിലും പാര്‍ട്ടി തലത്തില്‍ ഇപ്പോഴും വിഭാഗീയത കഠിനമായി തുടരുന്നുവെന്നത് ആശങ്കഉണ്ടാക്കുന്നെന്ന് ’ മോന്‍മൗത്ത് യൂനിവേഴ്സിറ്റി പോളിങ് ഇന്‍സ്റ്റിറ്റ്യൂട്ട് ഡയറക്ടര്‍ പാട്രിക് മറേ വെളിപ്പെടുത്തുന്നു .
