കച്ചാ ബദാം എന്ന ഗാനത്തിലൂടെ ശ്രദ്ധേയനായ ഭൂപന്‍ ഭാട്യകറിന് കാറപകടത്തില്‍ പരിക്ക്. അടുത്തിടെ വാങ്ങിയ കാറില്‍ ഡ്രൈവിങ് പരിശീലിക്കുന്നതിനിടെയാണ് അദ്ദേഹത്തിന് പരിക്കേറ്റത്.
ഉടന്‍ തന്നെ ഭൂപനെ സമീപത്തുള്ള സൂപ്പര്‍ സ്‌പെഷ്യാലിറ്റി ആശുപത്രിയില്‍ പ്രവേശിപ്പിച്ചു. ബദാം വിറ്റ് ഉപജീവനം നടത്തിയിരുന്ന ഭൂപന്‍, കച്ചാ ബദാം എന്ന ഗാനത്തിലൂടെയാണ് പ്രശസ്തനാകുന്നത്.
ആളുകളെ ആകര്‍ഷിക്കുന്നതിന് വേണ്ടി പാടിയ പാട്ട് ആരോ ഷൂട്ട് ചെയ്ത് സമൂഹമാദ്ധ്യമത്തില്‍ പങ്കു വച്ചതോടെയാണ് കച്ചാബദാം പാട്ടും, ഭൂപന്‍ ഭാട്യകറും വൈറലായത്. പാട്ട് വൈറലായതോടെ ഇദ്ദേഹത്തിന്റെ ജീവിതവും മാറി മറിഞ്ഞു. കച്ചാബദാം റീമിക്‌സിന് 50 മില്ല്യണിലധികം കാഴ്‌ച്ചക്കാരെയാണ് ലഭിച്ചത്. പാട്ടിന് റോയല്‍റ്റിയായി മൂന്ന് ലക്ഷം രൂപയാണ് മ്യൂസിക് കമ്ബനി നല്‍കിയത്. ഇനി ബദാം വില്‍പ്പനയ്‌ക്ക് പോകുന്നില്ലെന്ന തീരുമാനത്തിലായിരുന്നു ഭൂപന്‍. അതിനിടെയാണ് അപകടം സംഭവിക്കുന്നത്. പശ്ചിമബംഗാളിലെ കൂറല്‍ജുരി ഗ്രാമവാസിയാണ് ഭൂപന്‍. ഭാര്യയും മൂന്ന് മക്കളുമടങ്ങുന്ന കുടുംബം ഭൂപന്റെ വരുമാനത്തെ ആശ്രയിച്ചായിരുന്നു മുന്നോട്ട് പോയിരുന്നത്.
