2021-2022 കാലഘട്ടത്തില്‍ എട്ടുലക്ഷം തൊഴില്‍ അവസരങ്ങള്‍ സൃഷ്ടിക്കുമെന്ന് ധനമന്ത്രി ഡോ. ടി.എം. തോമസ് ഐസക്ക്. മൂന്ന് ലക്ഷം തൊഴിലവസരങ്ങള്‍ അഭ്യസ്തവിദ്യാര്‍ത്ഥും അഞ്ച് ലക്ഷം തൊഴില്‍ അവസരങ്ങള്‍ മറ്റുള്ളവര്‍ക്കുമാണെന്നും ധനമന്ത്രി പറഞ്ഞു.
ലോക്ക്ഡൗണില്‍ നിന്ന് പുറത്തുകടക്കുന്നതിന് മുഖ്യമന്ത്രിയുടെ നേതൃത്വത്തില്‍ 100 ദിനകര്‍മ പദ്ധതികള്‍ നടപ്പിലാക്കി. പദ്ധതി പൂര്‍ണമായും നടപ്പിലായി. 50,000 തൊഴില്‍ അവസരങ്ങള്‍ സൃഷ്ടിക്കുമെന്ന് പറഞ്ഞിടത്ത് ഒരു ലക്ഷത്തിലേറെ തൊഴിലുകള്‍ സൃഷ്ടിച്ചു. കാര്‍ഷിക മേഖലയിലും വലിയ കുതിപ്പിന് സുഭിക്ഷ കേരളം വഴിയൊരുക്കി. സമയബന്ധിതമായി പ്രൊജക്ടുകള്‍ പൂര്‍ത്തീകരിക്കപ്പെട്ടു. ഇപ്പോള്‍ 10,000 കോടിരൂപയുടെ വികസന പ്രവര്‍ത്തനങ്ങള്‍ രണ്ടാം കര്‍മ പരിപാടിയായി നടപ്പിലാക്കുകയാണെന്നും ധനമന്ത്രി പറഞ്ഞു.
