കൊച്ചിയിൽ നടി അപർണ ബാലമുരളിയോട് മോശമായി പെരുമാറിയ വിദ്യാർഥിക്ക് കാരണം കാണിക്കൽ നോട്ടീസ് നൽകി. എറണാകുളം ലോ കോളജ് പ്രിൻസിപ്പലാണ് കാരണം കാണിക്കൽ നോട്ടീസ് നൽകിയത്. ഇന്ന് തന്നെ ഇതിന് മറുപടി നൽകണമെന്നും, തൃപ്തികരമല്ലെങ്കിൽ നടപടിയെടുക്കുമെന്നും പ്രിൻസിപ്പൽ അറിയിച്ചു.
കഴിഞ്ഞ ബുധനാഴ്ച കോളേജ് യൂണിയൻ ഉത്ഘാടനവുമായി ബന്ധപ്പെട്ട് എറണാകുളം ലോ കോളേജിൽ എത്തിയപ്പോഴാണ് നടിയോട് യുവാവിന്റെ മോശം പെരുമാറ്റമുണ്ടായത്. നടിയെ സ്വീകരിക്കുന്നതിന്റെ ഭാഗമായി വേദിയിലെത്തിയ രണ്ടാം വർഷ എൽ എൽ ബി വിദ്യാർത്ഥിയായ വിഷ്ണു നടിയുടെ തോളിൽ കൈയ്യിടാൻ ശ്രമിച്ചു. എന്നാൽ അപർണ ഒഴിഞ്ഞു മാറുകയായിരുന്നു. ഈ സംഭവത്തിൻ്റെ വിഡിയോ പുറത്തുവന്നതോടെ അപർണയോടു വിദ്യാർഥി മോശമായി പെരുമാറിയതിൽ ലോ കോളജ് യൂണിയൻ അന്ന് തന്നെ ഖേദം പ്രകടിപ്പിച്ചിരുന്നു. തുടർന്നാണ് , വിഷ്ണുവിന് കാരണം കാണിക്കൽ നോട്ടീസ് നൽകിയത്. ഒപ്പം ഒരാഴ്ച്ചത്തേക്ക് സസ്പെൻഡ് ചെയ്തതായും കോളേജ് പ്രിൻസിപ്പൽ അറിയിച്ചു. കാരണം കാണിക്കലിന് ഇന്ന് തന്നെ മറുപടി നൽകണമെന്ന് ആവശ്യപ്പെട്ടിട്ടുണ്ട്. മറുപടി തൃപ്തികരമല്ലെങ്കിൽ നടപടിയെടുക്കാനാണ് പ്രിൻസിപ്പലിൻ്റെ തീരുമാനം. അതേ സമയം, സംഘാടകരോടു പരിഭവമില്ലെന്നും സംഭവം നടന്ന ഉടനെ തന്നെ അവർ ക്ഷമാപണം അറിയിച്ചതായും അപർണ പറഞ്ഞു.
