ന്യൂഡല്‍ഹി: ഒമിക്രോണിന്റെ പുതിയ വകഭേദം ഇന്ത്യയില്‍ കണ്ടെത്തി. ബിഎ.4, ബിഎ.5 എന്നിങ്ങനെ ഒമിക്രോമിണിന്റെ രണ്ട് ഉപ വകഭേദങ്ങളെയാണ് കണ്ടെത്തിയത്.
ഒരു കേസ് തമിഴ്നാട്ടിലും മറ്റെത് തെലങ്കാനയിലുമാണ് റിപ്പോര്‍ട്ട് ചെയ്തത്.
കൊറോണ വൈറസിന്റെ ഏറ്റവും വേഗത്തില്‍ വ്യാപിക്കുന്ന വകഭേദങ്ങളാണ് ഇവ. തമിഴ്നാട്ടില്‍ 19 കാരിയില്‍ ബിഎ.4വകഭേദവും തെലങ്കാനയിലെ 80കാരനില്‍ ബിഎ.5 വകഭേദവുമാണ് കണ്ടെത്തിയതെന്ന്
നാഷണല്‍ സെന്റര്‍ ഫോര്‍ ഡിസീസ് കണ്‍ട്രോളിന്റെ കീഴില്‍ പ്രവര്‍ത്തിക്കുന്ന ഐ.എന്‍.എസ്.എ.സി.ഒ.ജി (ഇന്ത്യന്‍ സാര്‍സ് കോവ്2 ജീനോമിക് കണ്‍സോള്‍ട്യം) പ്രസ്താവനയില്‍ പറഞ്ഞു. രോഗികള്‍ക്ക് ചെറിയ ലക്ഷണങ്ങള്‍ മാത്രമേയുള്ളു. വാക്സിന്‍ രണ്ട് ഡോസും സ്വീകരിച്ചവരും യാത്രാ പശ്ചാത്തലം ഇല്ലാത്തവരുമാണ്.
നേരത്തെ ഹൈദരാബാദ് വിമാനത്താവളത്തില്‍ ദക്ഷിണാഫ്രിക്കന്‍ സ്വദേശി ഒമിക്രോണ്‍ ബിഎ.4 പോസിറ്റീവായിരുന്നു.
രോഗ പ്രതിരോധ മാര്‍ഗമെന്ന നിലയില്‍ പുതിയ വകഭേദങ്ങള്‍ കണ്ടെത്തിയവരുമായി ബന്ധപ്പെടവരെ കണ്ടെത്താനുള്ള ശ്രമം ആരംഭിച്ചതായി ഐ.എന്‍.എസ്.എ.സി.ഒ.ജി അറിയിച്ചു.
പുതിയ വകഭേദങ്ങള്‍ ആഗോള തലത്തില്‍ അതിവേഗം വ്യാപിക്കുന്നുണ്ട്. ആദ്യം കണ്ടെത്തിയത് ദക്ഷിണാഫ്രിക്കയിലായിരുന്നു. പിന്നീട് പലരാജ്യങ്ങളില്‍ നിന്നും റിപ്പോര്‍ട്ട് ചെയ്തു. ഇന്ത്യയില്‍ ആദ്യമായാണ് കേസ് റിപ്പോര്‍ട്ട് ചെയ്യുന്നത്.
