ശബരിമല ജീവനക്കാർക്ക് വീണ്ടും കോവിഡ് സ്ഥിരീകരിച്ച സാഹചര്യത്തിൽ സന്നിധാനത്തും പരിസരത്തും കടുത്ത നിയന്ത്രണം. ഇതോടെ ശ്രീകോവിലിൽ നിന്ന് നേരിട്ട് പ്രസാദം വിതരണം ചെയ്യുന്നത് താൽക്കാലികമായി നിർത്തിവെച്ചു. അഞ്ച് പേർക്കാണ് കഴിഞ്ഞ മൂന്ന് ദിവസത്തിനുള്ളിൽ സന്നിധാനത്ത് മാത്രമായി വൈറസ് ബാധ സ്ഥിരീകരിച്ചത്. നിലയ്ക്കലിൽ നടത്തിയ പരിശോധനയിൽ നിരവധി ഭക്തർക്കും രോഗം കണ്ടെത്തിയിട്ടുണ്ട്.
ഭണ്ഡാരം സുരക്ഷാ ഡ്യൂട്ടിയിലുണ്ടായിരുന്ന പൊലീസുകാരനും പൊലീസ് മെസ്സിലെ ജീവനക്കാരനും രോഗം കണ്ടെത്തിയതിനാൽ ഭണ്ഡാരം താൽക്കാലികമായി അടച്ചു. പൊലീസ് മെസ്സിലും നിയന്ത്രണങ്ങൾ ഏർപ്പെടുത്തിയിട്ടുണ്ട്. കോവിഡ് നെഗറ്റീവ് സർട്ടിഫിക്കറ്റുമായി വരുന്ന ജീവനക്കാർക്കും വൈറസ് ബാധ സ്ഥിരീകരിക്കുന്ന സാഹചര്യമാണ് നിലവിൽ. ഇതോടെ ആരോഗ്യ വകുപ്പ് ആശങ്കയിലാണ്.
