കോഴിക്കോട്: ലൈംഗിക പീഡനക്കേസില്‍ എഴുത്തുകാരന്‍ സിവിക് ചന്ദ്രന്‍ വടകര ഡിവൈഎസ്‌പിക്ക് മുന്നില്‍ കീഴടങ്ങി.
കോഴിക്കോട് അഡീഷണല്‍ സെഷന്‍സ് കോടതി അനുവദിച്ച മുന്‍കൂര്‍ ജാമ്യം ഹൈക്കോടതി കഴിഞ്ഞ ദിവസം റദ്ദാക്കിയിരുന്നു. ഏഴ് ദിവസത്തിനകം അന്വേഷണ ഉദ്യോഗസ്ഥന് മുന്നില്‍ കീഴടങ്ങി ചോദ്യം ചെയ്യലിന് വിധേയമാകണമെന്നും കോടതി നിര്‍ദേശിച്ചിരുന്നു.
ഇക്കഴിഞ്ഞ ഏപ്രില്‍ 16ന് പുസ്തക പ്രകാശന ചടങ്ങിനെത്തിയ പ്രതി പിറ്റേന്ന് രാവിലെ യുവതിക്കെതിരെ ലൈംഗികാതിക്രമത്തിന് മുതിര്‍ന്നു എന്നാണ് പരാതി. പരാതിക്കാരി പട്ടിക വിഭാഗക്കാരിയാണെന്ന് അറിഞ്ഞുകൊണ്ടാണ് പ്രതി അക്രമത്തിന് മുതിര്‍ന്നത് എന്നാണ് പ്രോസിക്യൂഷന്‍ കേസ്. ആരോപിക്കപ്പെട്ട കുറ്റം പ്രഥമദൃഷ്ട്യാ ബാധകമല്ലെന്ന കീഴ്ക്കോടതി നിഗമനം ഹൈക്കോടതി റദ്ദാക്കി. ജാതി സമ്ബ്രദായത്തിനെതിരെ പോരാടുന്ന സിവിക് ചന്ദ്രന്‍, പട്ടികവര്‍ഗ വിഭാഗക്കാരിയാണെന്ന് അറിഞ്ഞുകൊണ്ട് യുവതിയെ ഉപദ്രവിച്ചെന്ന ആരോപണം വിശ്വസനീയമല്ലെന്ന് സെഷന്‍സ് കോടതി അഭിപ്രായപ്പെട്ടിരുന്നു. ഈ നിഗമനം ഹൈക്കോടതി റദ്ദാക്കി.
എഴുത്തുകാരിയും അദ്ധ്യാപികയുമായ മറ്റൊരു യുവതിയുടെ പരാതിയിലും സിവിക് ചന്ദ്രനെതിരെ കേസ് രജിസ്റ്റര്‍ ചെയ്തിരുന്നു. ഏപ്രില്‍ മാസത്തില്‍ നടന്ന സംഭവത്തിലാണ് യുവതി പരാതി നല്‍കിയത്. സംഭവത്തെ തുടര്‍ന്ന് നിരന്തരം ഫോണ്‍ വഴി ശല്യം തുടര്‍ന്നു എന്നും പരാതിയുണ്ടായിരുന്നു. ഈ കേസില്‍ മുന്‍കൂര്‍ ജാമ്യം ഹൈക്കോടതി അനുവദിച്ചതിനെ തുടര്‍ന്ന് കഴിഞ്ഞ ദിവസം കൊയിലാണ്ടി പൊലീസ് സിവിക്കിനെ അറസ്റ്റ് ചെയ്ത് ജാമ്യത്തില്‍ വിട്ടിരുന്നു.
