ടി20 ലോകകപ്പിനുള്ള ഇന്ത്യന്‍ സം‌ഘത്തെ ഉടനെ തന്നെ പ്രഖ്യാപിക്കുമെന്ന് റിപ്പോര്‍ട്ട്. 15 അംഗ ടീമിനെയാണ് പ്രഖ്യാപിക്കുക. ഈ മാസം പത്തിന് മുന്‍പ് ടീമുകള്‍ പട്ടിക കൈമാറണമെന്നാണ് നിയമം. അതിനാല്‍ തന്നെ ഇംഗ്ലണ്ടിനെതിരായ നാലാം ടെസ്റ്റ് അവസാനിക്കുന്നതിന് മുന്‍പ് തന്നെ ഇന്ത്യ ടീം പ്രഖ്യാപിച്ചേക്കുമെന്നാണ് റിപ്പോര്‍ട്ടുകള്‍.
സെലക്‌ടര്‍മാര്‍ ടീമിനെ തിരെഞ്ഞെടുത്തതായും ഇനി പ്രഖ്യാപനം മാത്രമെ ബാക്കിയുള്ളുവെന്നും ബിസിസിഐയോട് അടുത്തവൃത്തങ്ങള്‍ പറയുന്നു. ടീം പട്ടികയില്‍ മലയാളി താരം സഞ്ജു സാംസണ്‍ ഉള്‍പ്പെടുമോ എന്ന ആകാംക്ഷയിലാണ് ആരാധകര്‍. ഓപ്പണിങ് സ്ഥാനത്ത് രോഹിത് ശര്‍മ, കെഎല്‍ രാഹുല്‍ എന്നിവര്‍ക്ക് സ്ഥാനമുറപ്പാണ്. ഓപ്പണിങ് സ്ഥാനത്തേക്ക് ശിഖര്‍ ധവാനൊപ്പം പൃഥ്വി ഷായും പരിഗണനയിലുണ്ട്.
അതേസമയം മധ്യനിരയില്‍ ഇന്ത്യന്‍ നായകന്‍ വിരാട് കോലി,റിഷഭ് പന്ത്,സൂര്യകുമാര്‍ യാദവ് എന്നിവര്‍ ഉറപ്പാണ്. മധ്യനിരയിലേക്കായിരിക്കും സഞ്ജുവിനെയും പരിഗണിക്കുക. പരിക്ക് മാറി ടീമില്‍ തിരിച്ചെത്താന്‍ നില്‍ക്കുന്ന ശ്രേയസ് അയ്യരും ടീമില്‍ ഇടം പ്രതീക്ഷിക്കുന്നുണ്ട്.
പേസ് നിരയില്‍ ബു‌മ്രയ്ക്കൊപ്പം ഭുവനേശ്വര്‍ കുമാര്‍, ദീപക് ചഹാര്‍ എന്നിവര്‍ ഇടം പിടിച്ചേക്കും. യൂസ്‌വേന്ദ്ര ചഹലായിരിക്കും സ്പിന്‍ നിരയെ നയിക്കുക. ഓള്‍റൗണ്ടര്‍മാരായി ഹാര്‍ദ്ദിക് പാണ്ഡ്യയും രവീന്ദ്ര ജഡേജയും ഇടംപിടിക്കും. ഒക്‌ടോബര്‍ 24ന് പാകിസ്ഥാനുമായാണ് ടി20 ലോകകപ്പിലെ ഇന്ത്യയുടെ ആദ്യ മത്സരം.
