ഭൂമി വസന്തയുടേത് തന്നെയെന്ന് തഹസില്‍ദാർ ; കലക്ടര്‍ക്ക് റിപ്പോര്‍ട്ട് സമർപ്പിച്ചു

നെയ്യാറ്റിൻകരയിൽ ആത്മഹത്യ ചെയ്ത ദമ്പതികൾ ഭൂമി കയ്യേറിയതാണെന്നും ഭൂമി അയൽവാസിയായ വസന്തയുടേതാണെന്നും കണ്ടെത്തൽ. ഇത് സംബന്ധിച്ച് തഹസിൽദാർ കളക്ടർക്ക് റിപ്പോർട്ട് സമർപ്പിച്ചു. കഴിഞ്ഞ മാസം 22 ന് വീട് ഒഴിപ്പിക്കാനെത്തിയ പൊലീസുകാര്‍ക്ക് മുന്നില്‍ പെട്രോളൊഴിച്ച് തീകൊളുത്തുകയായിരുന്നു രാജനും ഭാര്യാ അമ്പിളിയും. തുടർന്ന് ഭൂമി സംബന്ധിച്ച് വലിയ തര്‍ക്കങ്ങളാണ് ഉയര്‍ന്നിരുന്നത്. തങ്ങള്‍ താമസിക്കുന്നത് പുറമ്പോക്ക് ഭൂമിയിലാണെന്ന വാദത്തിൽ ദമ്പതികളും മക്കളും ഉറച്ചുനിന്നിരുന്നു. വസന്തയും ഭുമി തന്റേതാണെന്ന നിലപാടില്‍ ഉറച്ചു നിന്നു. അതോടെയാണ് കേസിൽ വിശദമായ അന്വേഷണം നടത്തിയത്. ഇത് പരാതിക്കാരിയായ വസന്തയുടെ ഭൂമി തന്നെ ആണ് എന്നതാണ് തഹസില്‍ദാറുടെ റിപ്പോര്‍ട്ട്. വസന്തയുടെ ഭൂമി രാജന്‍ കയ്യേറിയതാണെന്നും റിപ്പോര്‍ട്ടിലുണ്ട്.